L’arvulu

Anche questa settimana è dedicata alla poesia. Pubblichiamo “L’arvulu” ovvero l’albero di benedetto Giovanni Belnome. E’ una lirica dialettale densa di significato che ben si presta a questi mesi così complessi in cui abbiamo dovuto ridisegnare la nostra quotidianità e rivedere i nostri rapporti. Buona lettura

Ci vosi tempu e finalmente acchianavi, 

pi circari acqua li rarichi affunnavi.

Nta sta bedda muntagna un ci manca mai nenti, 

un sugnu mai sulu a li voti veni genti.

Quannu nterra taliu ci viu un saccu di cosi,

Furmiculi, erva armaluzzi e li rosi.

La notti longha e friddusa mi fa scantari,

di matina lu suli, mi veni a circari, 

nesci da li nuvoli e felici mi trova,

sapi di sicuru chi l’aria si rinnova.

Pinsatici un pocu pi putiri campari,

avemu bisognu di terra, di luci, di mari. 

La natura fu sperta nta stu munnu di pazzi,

s’impunta reagisci, e fa pagari dazzi,

ma appena la corda veni assai tirata,

la risposta arriva puru a la scurdata,

l’aria si quaria, lu ghiacciu si sciogghi,

lu mari s’aisa e cummogghia li scogghi.

Sugnu un’arvulu sulu, haiu picca di fari,

m’addifennu resistu e viu di fruttari.

Ora sugnu virdi e lu ventu forti mi stanca, 

arriva l’estati e lu cavuru un manca. 

Tutta l’erva si sicca e l’acqua scarsia, 

speriamu chi st’annu finissi bonu pi mia.

A li voti succeri chi sciroccu si senti, 

curaggiu cumpagni, strincemu forti li renti, 

picchì un’incoscienti lu focu pò dari, 

lu sentu, partiu, lu fumu si viri già aisari. 

Lu frunti s’allarga e veni versu la via, 

putennu scappari, un mancassi certu pi mmia.

Li fiammi sunnu comu nfernu c’avanza, 

sentu sulamenti un sensu d’imputenza. 

Aspittari chi passa è nà vera turtura,

nn’ haiu vistu abbruciarisi cu la calura. 

Si un pezzu di mia arrivassi a sarvari, 

soccu staiu ora pruvannu, vi vulissi cuntari.

La lingua di focu cassutta è arrivata, 

la rama vascia già mi la sentu avvampata. 

Lu cavuru è forti, sugnu quasi svinutu, 

vulissi moriri nta stu pricisu minutu 

e comu lu ventu chi prima lu focu aiutau,

cu na fulata chiù forti mi l’alluntanau. 

Mutu chianciu li rami chi nivuri sunnu, 

a iddi ci arrivau pi sempri l’autunnu. 

Di jornu avvilutu viu la gran distruzioni. 

Cu chi ciriveddu si arriva a st’azioni. 

Pi sta gentagghia la vita unn’avi valuri, 

nta lu cori d’iddi ci manca l’amuri. 

Poi arriva lu mmernu e l’erva ricrisci,

priamu sulu chi un jornu stu scempiu finisci.

Cu tanta pacenzia la vita sempri riparti,

l’armali ritornanu da tutti li parti.

Stu vili dammaggiu oramai è cosa passata,

un si sapi quannu, sarà sicuru pagata.